काठमाडौं, चैत १४ — भौतिक पूर्वाधार, यातायात तथा सहरी विकास मन्त्रालयको जिम्मेवारी सम्हालेको पहिलो दिनमै मन्त्री सुनिल लम्सालले १० बुँदे महत्वपूर्ण निर्णय सार्वजनिक गरेका छन्। मन्त्रालयको कार्यशैली सुधार गर्दै विकास निर्माणका कामलाई तीव्रता दिने उद्देश्यसहित ती निर्णयहरू अघि सारिएको बताइएको छ।
पदबहालीपछि मन्त्रालय मातहतका कर्मचारीहरूलाई निर्देशन दिँदै मन्त्री लम्सालले निर्णयहरूको प्रभावकारी कार्यान्वयनमा जोड दिएका छन्। उनका अनुसार ढिलासुस्ती नियन्त्रण, पारदर्शिता वृद्धि र सुशासन प्रवर्द्धनलाई प्राथमिकतामा राखिएको छ।
मन्त्री लम्सालद्वारा सार्वजनिक प्रमुख निर्णयहरू यसप्रकार छन्:
१. म्याद थप हुने गरी कुनै पनि योजना अगाडि नबढाउने र समयमै सम्पन्न गर्ने व्यवस्था गर्ने।
२. समयमै सम्पन्न नभएका सबै ठेक्कालाई ‘रुग्ण योजना’ मानेर अध्ययन गर्ने।
३. ठेक्का ढिलाइका कारणहरू पहिचान गरी अवरोधहरू तत्काल हटाउने।
४. ठेकेदार र इन्जिनियरबीच हुने साँठगाँठ तथा आर्थिक चलखेल पूर्ण रूपमा रोक्ने।
५. भ्रष्टाचारजन्य गतिविधि दोहोरिन नदिन कडा निगरानी गर्ने।
६. भौतिक पूर्वाधारका सबै योजनामा नियमित अनुगमन तथा प्रगति मूल्यांकन गर्ने।
७. लाइसेन्स छपाइ प्रणालीलाई व्यवस्थित गर्दै बक्यौता समस्या समाधान गर्ने।
८. अस्थायी व्यवस्थामा चिप बिनाको कार्ड तुरुन्त उपलब्ध गराउने व्यवस्था गर्ने।
९. पानीजहाज कार्यालय र रेल विभागको कार्यप्रणाली तथा उपादेयताबारे समीक्षा गर्ने।
१०. पूर्व–पश्चिम रेल परियोजनालाई प्राथमिकतामा राखी कार्यान्वयन अघि बढाउने।
मन्त्री लम्सालका यी निर्णयहरूले मन्त्रालय अन्तर्गत वर्षौंदेखि देखिँदै आएका समस्या समाधान गर्न सहयोग पुग्ने र विकास निर्माणका कार्यमा गति आउने अपेक्षा गरिएको छ। साथै, सुशासन प्रवर्द्धन र पारदर्शिता बढाउन यी निर्णयहरू महत्वपूर्ण हुने विश्वास व्यक्त गरिएको छ।
