लमही, दाङ । दाङमा सञ्चालित सञ्जीवनी टिचिङ हस्पिटलले आफ्नो सेवा विस्तारलाई तीव्रता दिँदै विशिष्टीकृत (सुपरस्पेशियालिटी) स्वास्थ्य सेवाहरू सञ्चालनमा ल्याउने घोषणा गरेको छ। माघ २८ गतेदेखि सेवा सुरु गरेको यस अस्पतालले आगामी एक महिनाभित्र न्युरोलोजी, कार्डियोलोजी र युरोलोजी अन्तर्गतका सुपरस्पेशियालिटी सेवाहरू उपलब्ध गराउने तयारी गरेको हो। यससम्बन्धी जानकारी बिहीवार लमहीमा आयोजित पत्रकार सम्मेलनमार्फत गराइएको छ।
अस्पतालको यस पहलले साविक राप्ती क्षेत्रका बिरामीहरूलाई उपचारका लागि बाँके र रुपन्देही जस्ता ठूला शहरहरूमा जानुपर्ने बाध्यता कम हुने अपेक्षा गरिएको छ। यसबाट स्थानीय स्तरमै गुणस्तरीय र विशिष्टीकृत स्वास्थ्य सेवाको पहुँच सुनिश्चित हुनेछ।
अत्याधुनिक प्रविधि र पूर्वाधार
सञ्जीवनी टिचिङ हस्पिटलले अत्याधुनिक प्रविधि र पूर्वाधारमा ठूलो लगानी गरेको छ। अस्पतालमा जर्मनीको सिमेन्स कम्पनीको १.५ टेस्ला क्षमताको एमआरआई मेसिन जडान गरिएको छ, जुन ‘हेलियम फ्री’ प्रविधियुक्त नेपालकै पहिलो मेसिन भएको अस्पतालले जनाएको छ। यसका साथै, १९२ स्लाइस क्षमताको सिटी स्क्यान मेसिनबाट पनि सेवा प्रदान गरिँदै आएको छ।
करिब चार अर्ब रुपैयाँको लगानीमा निर्माण सम्पन्न भएको यस अस्पतालमा हाल ३०० शय्या सञ्चालनमा छन्। अस्पतालले आगामी तीन वर्षभित्र शय्या संख्या ५०० पुर्याउने लक्ष्य राखेको छ, जुन हालकै संरचनाबाट विस्तार गर्न सकिने बताइएको छ।
उपलब्ध सेवाहरू
अस्पतालले हाल विभिन्न विशेषज्ञ सेवाहरू प्रदान गरिरहेको छ। ओपिडी सेवाअन्तर्गत जनरल फिजिसियन, हाडजोर्नी तथा नशा, स्त्री तथा प्रसूति, जनरल सर्जरी, मानसिक तथा नसारोग, छाला तथा यौन, बालरोग, मुटुरोग, ग्यास्ट्रोलोजी, इएनटी, दन्त, नेत्र, एनेस्थेसियोलोजी, प्याथोलोजी, रेडियोलोजी तथा फिजियोथेरापी सेवाहरू उपलब्ध छन्।
क्रिटिकल केयरतर्फ आइसियु, सिसियु, एमआइसियु, एनआइसियु, पिआइसियु, एसआइसियु, एचडियु तथा हेमोडायलासिस सेवा सञ्चालनमा छन्। रेडियोग्राफी सेवामा डिजिटल एक्स–रे, भिडियो एक्स–रे, म्यामोग्राफी, इसिजी, इको, सिटी स्क्यान, एमआरआई, इन्टरभेन्सनल इन्डोस्कोपी र कोलोनोस्कोपी सेवाहरू समावेश छन्।
भर्ना हुनुपर्ने बिरामीका लागि जनरल वार्ड तथा क्याबिनको व्यवस्था गरिएको छ। साथै, क्याथ ल्याब, पीएफटी, इएमजी, ईईजी, ब्लड बैंक र एम्बुलेन्स सेवा पनि उपलब्ध छन्। अस्पतालले २४ सै घण्टा इमर्जेन्सी, फार्मेसी, ल्याब र सिटी स्क्यान सेवा प्रदान गरिरहेको छ। मोडुलर अपरेशन थिएटरमार्फत सामान्यदेखि जटिल सर्जरीसमेत सञ्चालन भइरहेका छन्।
शैक्षिक कार्यक्रम र रोजगारी
स्वास्थ्य सेवाका साथै, सञ्जीवनी टिचिङ हस्पिटलले शैक्षिक क्षेत्रमा पनि योगदान पुर्याउने लक्ष्य राखेको छ। आगामी वर्षदेखि नर्सिङ तथा पारामेडिक्स विषयको अध्यापन सुरु गर्ने योजना रहेको अस्पतालले जनाएको छ। यसका अतिरिक्त, आगामी तीन वर्षभित्र एमबीबीएस र बीडीएस कार्यक्रम सञ्चालन गर्ने महत्वाकांक्षी लक्ष्य पनि राखिएको छ।
हाल अस्पतालमा करिब ३५० जनाले रोजगारी पाएका छन्, जसले स्थानीय स्तरमा रोजगारी सिर्जनामा पनि महत्वपूर्ण भूमिका खेलेको छ।
प्रतिबद्धता
निजी क्षेत्रको लगानीमा स्थापित यस अस्पतालले जनस्वास्थ्य सेवा ऐन २०७५, जनस्वास्थ्य सेवा नियमावली २०७७ तथा स्वास्थ्य संस्था सञ्चालन मापदण्ड २०७७ अनुरूप सेवा प्रवाह गर्ने प्रतिबद्धता जनाएको छ। अस्पतालका प्रमुख कार्यकारी अधिकृत दीपक रोकाले गुणस्तरीय स्वास्थ्य सेवा प्रदान गर्न संस्था पूर्ण रूपमा प्रतिबद्ध रहेको बताए।
